San Martin merkatua

"Duela hamalau urte hasi ginen nekazaritza ekologikoaren ekoizpenarekin, Astigarragako gure Lizardi Baserrian. Gure fruitu eta barazki guztiak nekazaritza ekologikoko arau guztiak errespetatuz lortzen ditugu".

“Duela 14 urte, Joxanek, koinatuak, eta biok gure lanbideak utzi eta baratza ekologikoari ekin genion Astigarragan, haren gurasoen baserrian. Niretzat, mundu ezezaguna zen. Joxan Nafarroara joan zen urte betez ikastera. Nik Fraisoron ikastaro bat egin nuen. Gauza asko ikasi nituen. Hasierak zailak izan ziren. Dena berria zen. Amonaren laguntza oso garrantzitsua izan zen. Eskerrak!”, kontatzen digu Jabi Loiartek. Gure produktu propioak prestatzen ditugu belar eta mineralekin lurra indartzeko eta gure laborantzak babesteko izurrite eta gaixotasunetatik. Gure baratzeak modu artisauan lantzen ditugu, eta, lurra aberasteko, gure konposta lantzen dugu.Barazkiak saltzen ditugu, gehien bat, baina baita arrautzak, fruta pixka bat, garbantzuak, dilistak, eztia, ogia… Gure produktu guztiak ekologikoak eta garaian garaikoak dira. Gure baratzekoak eta neguan, hainbat tokietatik ekarritakoak ere. Udara partean, gehienak etxeko produktuak dira. Hasiera zailak izan baziren ere, orain oso gustura gaude salmentarekin. Gainera, bi kontsumoko talde ditugu Donostian”.

Itzuli

San Martin merkatua

Kalitatea, zerbitzua, aukera handia eta prezioa dira Super Amararen lau zutabe nagusiak.

Profesionalez osatutako talde nabarmen batek arreta bikaina eskaintzen die bezeroei, Super Amaran erosketa egitea paseo atsegina bihurtuz.

Itzuli

San Martin merkatua

Aisialdi kulturalerako produktuen Europako hornitzaile nagusia, Fnac merkataritzaren eta kulturaren arteko batasunaren adibide bakarra da.

Literaturak, musikak, irudiek, soinuak eta teknologiak osatzen dute denda donostiarraren eskaintza, bere forumean joera klasikoenak eta abangoardistenak biltzen dituena, kontzertuen, aurkezpenen eta erakusketen bidez.

Itzuli

San Martin merkatua

Eneriz Imaz langile nekaezina eta baikorra da. Arretaz zaintzen du bere fruta- eta barazki-postua. Horri esker, kalitate bikaineko produktuez beteta egoten da beti. Mugaritz jatetxearen hornitzailea da eta, David Bisbal Donostiara etortzen den bakoitzean, sasoiko ilarrak edo beste edozer erosten dio.

"Askotariko barazkiak ditut, kalitate handikoak eta egunean bertan moztuak. Perretxikoen mundua izugarri gustatzen zait: onddoak, zizak, ziza horiak eta gorringoak saltzen ditut. Ezti naturalak ere baditut, baita tomateak eta sasoiko produktu guztiak ere. Horrez gain, belarrekin egindako ukenduak, artisau-eztia eta abar ditut. Orain, barazki txikietan espezializatzen ari naiz, jatetxeei saltzeko, adibidez Andoni Luis Adurizen Mugaritzi. Izugarri gustatzen zait nire lana".

Itzuli

San Martin merkatua

40 ogi mota baino gehiago eta askotariko opilen eskaintza. Horiexek dira Taloren bereizgarriak. “Ogi artean hezi naiz eta ikaragarri gustatzen zait joerei jarraitzea, baita gure bezeroen gustuei aurrea hartzea ere”, diosku Ainhoa Martínezek, San Martin merkatuko okindegi bakarraren jabeak.

“Gure indarretako bat produktua sarri aldatzea da. 40 ogi mota baino gehiago eta askotariko opilen eskaintza ditugu. Ogiaren boutique bat gara. Jantzi-dendetan bezala, Talon ere bi sasoi ditugu urtean, eta horietan produktu berriak aurkezten ditugu. Nik joerei jarraitzen diet eta ahal dudan guztietan bidaiatzen dut, munduko hainbat herrialdetako okindegiak eta merkatuak ezagutzeko. Nire hobby bat da. Gure bezeroak xarmagarriak dira. Askotarikoak dira: pasoko jendea, turistak eta merkatura egunero erosketak egitera datozen pertsonak. Nik hori aintzat hartzen ikasi dut eta mundu guztia animatu nahi dut erosketak egiteko merkatura etortzera. Merezi du. Guri asko gustatzen zaigu bezeroei aholkuak ematea. Prestatu beharreko menuaren arabera, ogi mota bat edo beste gomendatzen diegu. Horixe egiten dugu, adibidez, GastroPoten. Zerbitzatuko diren pintxoen arabera, ogi mota bat edo beste proposatzen dugu”.

"Oso leku erosoa ere badugu, mahai eta aulkiekin, bezeroek gosaltzeko, gozoa eta gazia, baita igande goizetan ere".

Itzuli

San Martin merkatua

Juani Iraola emakume alaia, bizia eta saiatua da. Oso gazterik hasi zen merkatuan lanean, ama Antxoni orkatilako lesio batetik sendatzen zen bitartean. Dagoeneko 50 urte baino gehiago igaro dira. Urte horietan guztietan, Martuteneko bere baserrian landatzen dituen barazkiak saltzen jardun du.

“Nire ama 84 urte bete arte egon zen merkatuan. 96 urte zituela hil zen. Asko maite zuten eta Udalak omenaldi batzuk egin zizkion. Poz-pozik nago merkatu honetan, batez ere zaharberritu zutenetik. Baratzean lan egitea oso nekagarria da. Gogorra da, lan handia egin behar da. Nire bezero batzuek hiri-baratzeak hartu dituzte, baina ez dute luzaroan iraun. Ondo dago jendeak jakitea zenbat kostatzen den baratze bat aurrera ateratzea, gure lanari balioa emateko. Hemen, merkatuan, gauza guztiek itxura ederra dute, baina baserrian bestela da. Gainera, orain izurri asko daude: barraskiloak, harrak... Lehen, tomateari bakarrik ematen genion tratamendu txiki bat, ez herdoiltzeko; gainerako produktuei, ezer ez. Orain, berriz, perrexileraino ere heltzen dira izurriak. Edonola ere, ez nuke lan hau ezeren truke ere aldatuko”.

Itzuli

San Martin merkatua

Mikel Urrestarazuk aita Nicasio zenaren urratsak jarraitu zituen, horrek duela 50 urte baino gehiago sortutako harategian. Emaztearekin eta bere taldearekin batera, kementsu egiten du lan, haragiak arte-lan baten itxura har dezan. Nabarmenak dira gama altuko urdaitegiko produktuen sorta eta etxeko lantegian prestatutako jakien aldeko apustua. «Etengabe ari gara gure produktua eta bezeroarekiko arreta hobetzen».

«18 urte nituela, Marianistetan UBIa bukatu ondoren, harategian lan egiten hasi nintzen. Ikasle ona nintzenez, irakasleek karrera bat egitera animatu ninduten, baina ni harategi batean hazitakoa naiz. Aitak oso negozio oparoa eraiki zuen hutsetik, eta seme bakarrak berarekin jarrai zezan nahi zuen. Hamarkada batzuk igaro dira ordutik.

Gaur egun, inoiz baino harroago egon gaitezke haragiaren kalitateaz. Baztango txahala eta rubia galega arrazako behia dira gure espezialitateak. Urdaitegian, gure produktu guztien kalitatea hobetu dugu, gama altukoak dira eta iberikorik eta urdaiazpiko egosirik onenak ditugu.

Gainera, Casa Nicasion harro gaude gure lantegian prestatutako produktuez. Lantegia merkatuan bertan dagoenez, saltokitik metro gutxira, gure platerak egin berriak izaten dira eta etengabe berritzen ditugu. Eskarmentu handiko eskuek prestatzen dituzte, etxeko betiko zaporeak eskainiz. Gure bezeroen egunerokoa errazten duen betiko janaria da».

Itzuli

San Martin merkatua

Javier Muñoa txuleta, oilasko eta urdaiazpikoen artean hezi zen. Izan ere, txiki-txikitatik laguntzen zion aitari 1954an sortutako familia-harategian. Duela urte batzuetatik gourmet harategi ospetsu bat kudeatzen du, emazte Maite Bravorekin batera. Haien bezeroen artean chef entzutetsuak daude.

"Kalitate handiko haragi gorriak aukeratzen ditugu, koipe-iragazketa, kolorea eta testura oinarri hartuta. Era berean, askotariko haragi-produktuak eskaintzen ditugu, hala nola txahalkia, txerriki iberikoa, esne-arkumea eta bertako hegaztiak. Argi dugu bezeroa motibaturik izan behar dugula eta, horretarako, kalitateko produktu berriak eskaini behar dizkiogula. Izugarri gustatzen zaigu harritzea! Adi begiratzen diegu merkatuko berritasunei. Edozein produktu berri saldu aurretik, lehenbizi guri gustatu behar zaigu; bestela, ez dugu saltzen. Guretzat, kalitatea eta arreta funtsezkoak dira. Horrez gain, gourmet produktuen aukera zaindua dugu. Horien artean, azpimarratzekoak dira artisau-foiea, urdaiazpiko %100 iberikoa eta kontserbak, besteak beste".

Itzuli

San Martin merkatua

"Salamancako urdaitegien tradizio luzeko familia bat gara. Hemen, kalitatea eta zaporea dira nagusi. Mokadu bakoitzarekin Salamancako lurretara bidaiatzen dugu".

“Niri ikaragarri gustatzen zait San Martinen lan egitea. Hamarkadak daramatzagu hemen, Donostian aurki daitezkeen ezkur-iberikorik onenak saltzen: urdaiazpikoak, txorizoak, saltxitxoiak eta solomoa. Markarik ospetsuenak eta Guijueloko gure iberiko propioen aukera zorrotza. Guk geuk aukeratzen ditugu abereak eta haiengandik onena ateratzen dugu, San Martinen saltzeko. Horrez gain, Idiazabalgo, Mantxako eta Frantziako gaztak saltzen ditugu, baita hainbat sari irabazi dituen txistor bikaina ere. Eta ez dugu txerriki iberikoa ahaztu behar: luma, presa eta sekretua. Gure produktuek munduan zehar bidaiatzen dute, turista askok erosi eta maletan eramaten dituztelako. Maribelen, dena da gozoa! Produktua asko zaintzen dugu.

Orain, gainera, barran txoko bat daukagu, non urdaiazpiko eta gazta ogitartekoak, pintxoak eta razioak eskaintzen ditugun ardoz lagunduta nahi izanez gero, gure produktuak dastatu eta merkatutik oso aho zapore onarekin alde egin ahal izateko".

Itzuli